Friday, December 7, 2007

കാരന്തൂര്‍ നായര്‍

നായര‍് സീനിയര്‍ ബാച്ചിലെ അംഗമായിരുന്നു. നല്ലസ്സലു മാപ്ലയായിരുന്നെങ്കിലും (വടക്ക് മുസ്ലീങ്ങളാണ് മാപ്ല) വിളി കാരന്തൂര്‍ നായര്‍ എന്നായിരുന്നു. ഗേഹം കാരന്തൂരായതിനാല്‍ മറ്റു സഹജീവജാലങ്ങളെപ്പോലെ ഹോസ്റ്റല്‍ ജീവിതം നയിക്കാനുള്ള ഭാഗ്യമില്ലാതെ 'ഡേ-സ്കി'യായി, അസ്മാദൃശനായി, അനാശാസ്യനായി (ച്ചാല്‍, ആശാരഹിതനായി എന്ന്. അല്ലാതെ...) വര്‍ത്തിച്ചു പോന്നു. എന്നിരുന്നാലും, ഹോസ്റ്റല്‍ ദേഹത്തിനു ഒരു വിലക്കപ്പെട്ട കനിയായതിനാല്‍ പ്രത്യേകിച്ചും, മിക്കവാറും സമയങ്ങളില്‍ വല്ലവരുടെയും റൂമുകളില്‍ കുടികിടപ്പാക്കിപ്പോന്നു. (ഇപ്പറഞ്ഞതു രണ്ടും ഉണ്ടായിരുന്നോ എന്നു ചോദിച്ചാല്‍ എനിക്കറിയില്ല, ഞാന്‍ പറയില്ല! എന്തായാലും കിടപ്പുണ്ടായിരുന്നു എന്നത് അവിതര്‍ക്കിതവും സംശയരഹിതവുമാകുന്നു). ദേഹത്തിന്റെ ചില സംശയങ്ങള്‍ കാരണവും, സംശയനിവാരണത്തിനുപയോഗിക്കാറുള്ള ചോദ്യങ്ങള്‍ കാരണവും, മറ്റു പല വെള്ളികള്‍ കാരണവും ദേഹി ഒരു മാതിരി പ്രശസ്തമായിരുന്നു. സുപ്രസിദ്ധനായിത്തീര്‍ന്നത് നൈജീരിയക്കാരാലാണ്:

സീനിയേഴ്സ് ഫൈനല്‍ സെമസ്റ്ററുകളില്‍ (ഹിയറാഫ്റ്റര്‍ റെഫേഡ് റ്റു ഏസ് 'സെം') PG-1 ഹോസ്റ്റലിലായിരുന്നു കുടിപാര്‍ത്തിരുന്നത് (ഇവിടെയും ഇപ്പറഞ്ഞതു രണ്ടും ഉണ്ടായിരുന്നോ എന്ന് എന്നോട് ചോദിക്കരുത്). അക്കാഡമിക് ഇയറിന്റെ ആരംഭത്തില്‍ തന്നെ പതിവു പോലെ കുര‍്യാക്കോസ് (എഗയ്‌ന്‍, മേനോനല്ല) ചൂടു വാര്‍ത്ത വെള്ളരിക്ക് ഉപ്പുവളമിടുന്നതു പോലെ വിതറിയിട്ടു പോയി. MTech അഡ്മിഷന‍് രണ്ട് നൈജീരിയക്കാരുമുണ്ടത്രെ ! അവരെ കുടിയിരുത്താന്‍ പോകുന്നത് അതേ PG-1 ഹോസ്റ്റലില്‍! പക്ഷേ കോംപ്-സ്കി ഡിപ്പാര്‍ട്ട്മെന‍്റ്റ് അല്ലെന്നാണറിഞ്ഞത്. കുര‍്യന്‍ വാര്‍ത്ത ചൂടോടെ റൂമായ റൂമുകളിലെല്ലാം ഡെലിവര്‍ ചെയ്ത്, ഇനിയെങ്കിലും അല്പം ശ്വാസം കഴിച്ചില്ലേല്‍ മോശമല്ലേ എന്നു കരുതി ലേശം ബ്രേക്ക് എടുത്തു.

അങ്ങനെ ആറ്റുനോറ്റിരുന്ന് (ആരിരുന്നു? ചുമ്മാ ഒരിഫക്റ്റിന‍്...) നമ്മടെ നൈജീരിയക്കാര്‍ അല്പദിവസങ്ങള്‍ക്കു ശേഷം ഹോസ്റ്റലില്‍ എത്തിച്ചേര്‍ന്നു. അവിടെയും പതിവുപോലെ കുര‍്യാക്കോസ് ആണ് അക്കൂട്ടരെ ആദ്യം പരിചയപ്പെടുന്നത്. ആയതിനാല്‍ വാര്‍ത്ത വീണ്ടും എലിചത്ത മണം പോലെ അതിവേഗം പടര്‍ന്നു. കേട്ടവര്‍ കേട്ടവര്‍ വന്ന്, പരിചയപ്പെട്ട്, വിശേഷങ്ങളന‍്വേഷിച്ച്, അഭിവാദ്യങ്ങളര്‍പ്പിച്ച് തിരിച്ചു പോയി. നായര്‍ ഹോസ്റ്റലില്‍ ഇല്ലാതിരുന്നത് കാരണം വെവരങ്ങള്‍ അറിയാതെ പോയി.

അടുത്ത ദിവസം വൈകീട്ട് ക്ലാസ് കഴിഞ്ഞ് ഹോസ്റ്റലേഴ്സിന്റെ കൂടെ മെസ്സില്‍ നിന്നു ഓസിനു ചായയടിക്കാന്‍ കാരന്തൂര്‍ നായരും ഹോസ്റ്റലിലേക്കു പോന്നു. ചായ കുടി കഴിഞ്ഞു പുറത്തിറങ്ങി ഒന്നാം നിലയില്‍ ആരുടെയോ റുമിലേക്കു പോകുന്ന വഴിക്കാണ് അരഭിത്തിയിലിരുന്നു വര്‍ത്താനം പറയുന്ന നൈജീരിയക്കാരെ കണ്ടത്. കൂടെയുള്ളവര്‍ പരിചയപ്പെടുത്തി.

"നായരേ, അതാണ് മ്മടെ നൈജീരിയക്കാര‍് . പരിചയപ്പെടണ്ടേ?"

നായര്‍‌ക്കെന്തു വിസമ്മതം. സിനിമാ സ്റ്റൈലില്‍ ചാടി ചെന്ന് ചോദിച്ചു:

"ഹലോ... ആപ് കാ നാം ക്യാ ഹേ?"

-----------------

10 മറുവാക്കുകള്‍:

  1. ഉപാസന | Upasana said...

    Nambyaare,

    നായര്‍‌ക്കെന്തു വിസമ്മതം. സിനിമാ സ്റ്റൈലില്‍ ചാടി ചെന്ന് ചോദിച്ചു:

    "ഹലോ... ആപ് കാ നാം ക്യാ ഹേ?"

    :)))
    koLLaam ttO

    upaasana

  2. ജ്യോനവന്‍ said...

    (ച്ചാല്‍, ആശാരഹിതനായി എന്ന്. അല്ലാതെ...)
    നന്നായി ഠോ
    ഇതെങ്ങനെ ശ്ലഥചിന്തയായി?

  3. പ്രിയ ഉണ്ണികൃഷ്ണന്‍ said...

    ഹ ഹ ഹ അവസാനം കലക്കി ട്ടൊ.

    ഓ.ടൊ: സ്വപ്നഭുമി പ്രിയപ്പെട്ടില്ലേ?

  4. ശ്രീ said...

    കൊള്ളാം.

    :)

  5. സണ്ണിക്കുട്ടന്‍ /Sunnikuttan said...

    "ആയതിനാല്‍ വാര്‍ത്ത വീണ്ടും എലിചത്ത മണം പോലെ അതിവേഗം പടര്‍ന്നു"

    ഈ പ്രയോഗം കൊള്ളാം മാഷെ

  6. Satheesh :: സതീഷ് said...

    ഒരു സിഗ്നേച്ചര്‍ എഴുത്താണല്ലോ! കലക്കീട്ട്ണ്ട്!
    ഇത്രയും നാളും ഈ ബ്ലോഗ് കാണാതെ പോയതിലൊരു വിഷമം!

  7. സി. കെ. ബാബു said...

    ഈ "ആപ് കാ നാം ക്യാ ഹേ?" ന്ന്വച്ചാല്‍ "നീ ആപ്പു് കേറ്റീതു് നോം കണ്ടൂ ഹേ!" എന്നോ മറ്റോ അല്ലേ? ആയ കാലത്തു് പൊടിക്കു് നൈജീരിയന്‍ ഭാഷ വശത്താക്കാന്‍ തോന്നീതിപ്പോ ഭാഗ്യായീന്നു് പറഞ്ഞാ മതീല്ലോ! കടവുളേ!

  8. ശ്രീലാല്‍ said...

    രസായെട്ടാ.

    ഹോസ്റ്റലില്‍ നിന്നു പഠിക്കെണ്ട് ഭാഗ്യം ഈയുള്ളവനുകിട്ടാത്തതിനാല്‍ ആരു ഹോസ്റ്റല്‍ കഥ പറയുമ്പോഴും ഒരു അസൂയയാ രജീഷേ.. :(

  9. lekhavijay said...

    അപ്പൊ എനിക്കും അറിയാം കുറച്ച് നൈജീരിയന്‍ ഭാഷ..:)
    നന്നായി.

  10. കൂട്ടുകാരന്‍ said...

    നായര് കലക്കി...ഇപ്പൊ നായര്‍ നൈജീരിയയില്‍ ആണൊ????...:)